۸صبح، کابل: د طالبانو د سوداګرۍ او پانګونې خونې رییس د هند له سفیر سره د دواړو هېوادونو ترمنځ د سوداګرۍ او پانګونې په برخه کې د اړیکو د پیاوړتیا په تړاو خبرې کړې دي.
د طالبانو د سوداګرۍ او پانګونې خونې شنبه د چنګاښ پر ۲۷مه پر اېکس پاڼه په خپره کړې خبرپاڼه کې ویلي، په دې کتنه کې د صادراتو پر پراختیا، د سوداګرۍ د اسانتیاوو پر ښه کولو او د سوداګریزو ویزو د ورکړې د بهیر پر ساده کولو ټینګار شوی دی.
په دې کتنه کې د لوژستیکي خدمتونو د پیاوړتیا او د کرنې، کانونو او لاسي صنایعو په برخو کې د همکاریو د زیاتولو په تړاو هم خبرې شوې دي.
د طالبانو په وینا، په دې کتنه کې هوکړه شوې چې ګډ نندارتونونه، سوداګریز پلاوي او د دواړو هېوادونو د خصوصي سکټور ترمنځ اوږدمهالې همکارۍ پراخې شي.
هند د افغانستان لپاره د سیمې له مهمو سوداګریزو شریکانو ګڼل کېږي.
د ۲۰۲۱ کال په اګست کې د طالبانو له بیا واکمنېدو وروسته، له سیاسي ننګونو سره سره د کابل او نوي ډیلي ترمنځ اقتصادي او سوداګریزې اړیکې دوام لري.
