۸صبح، کابل: له پولیو پاک افغانستان بنسټ له کورنیو غوښتي چې خپل ماشومان د پولیو پر وړاندې د واکسین په هغه سراسري کمپاین کې واکسین کړي چې د روانې اوونۍ په لړ کې پیلېږي.
دغه بنسټ شنبه د لړم پر ۹مه، پر خپله ایکسپاڼه لیکلي چې ټولې کورنۍ باید له ګوزڼ ناروغۍ د افغانستان د پاکولو لپاره خپله ونډه ادا کړي.
ټاکل شوې ده چې دغه کمپاین د دوشنبې په ورځ د لړم پر ۱۱مه، د افغانستان په ټولو سیمو کې پیل شي.
دغه بنسټ له هېوادوالو غوښتي چې په دې کمپاین کې د خپلو ماشومانو په واکسینولو سره د پولیو ناروغۍ د خپرېدو د مخنیوي لپاره همکاري وکړي.
دا کمپاین په داسې حال کې ترسره کېږي چې افغانستان لا هم د نړۍ له هغو دوو هېوادونو دی چې د پولیو ویروس پکې شته.
د ملګرو ملتونو د ماشومانو د ملاتړ صندوق (یونیسف) هم اعلان کړی چې په افغانستان کې ۱۲.۷ میلیونه ماشومان د پولیو یا ګوزڼ ناروغۍ پر وړاندې واکسین شوي دي.
