۸صبح، لوګر: د طالبانو د عامې روغتیا وزارت د افغان ځوانانو له موسسې (AYSO) سره په لوګر کې د خوارځواکۍ د کمولو او روغتیايي خدماتو د ښه کولو لپاره د ۳۶۸ زرو او ۸۷۰ ډالرو په ارزښت هوکړه لاسلیک کړې ده.
نوموړي وزارت دوشنبه د زمري پر ۱۲مه په خپرې کړې خبرپاڼې کې ویلي چې دا پروژه د درېیو کالو لپاره ده.
ویل کېږي چې د دغې پروژې موخه د ماشومانو د لنډ قد او د خوارځواکۍ د نورو ډولونو کچې راکمول، د روغتیايي خدماتو ښه کول او روغتیايي خدماتو ته د لوګر اوسېدونکو د لاسرسي زیاتول دي.
د دغې هوکړې له مخې، روغتیايي خدمات به د ۱۳ روغتیايي مرکزونو او «۵۰ روغتیايي ژغورنځایونو» له لارې ۱۱ زرو او ۹۱۶ کسانو ته وړاندې شي.
همدارنګه په روغتیايي برخه کې به ۱۰۸ کسانو ته کاري بوختیا هم برابره شي.
خوارځواکي په افغانستان کې لویه روغتیايي ننګونه ده چې تر ډېره ماشومان او ښځې اغېزمنوي.
اړینو خوړو ته نه لاسرسی، بېوزلي، اقتصادي ستونزې او روغتیايي خدماتو ته محدود لاسرسی هغه لاملونه دي د هېواد په ځينو سیمو کې یې د خوارځواکۍ کچه لوړه کړې ده.
