۸صبح، کابل: طالبانو ویلي چې د بدخشان په واخان کې ۱۲۱ کیلومتره سړک چې افغانستان د واخان دهلیز له لارې له چین سره نښلوي، د رغولو چارې یې بشپړې او ګټې اخیستنې ته وسپارل شو.
باختر خبري اژانس یکشنبه د تلې پر ۱۲مه راپور ورکړی چې دا سړک د بروغیل له سیمې د چین تر پولې غځېدلی او د جوړولو چارې یې په دوو پړاوونو کې ترسره شوې دي.
د راپور له مخې، د دغه سړک پر رغولو ټولې ۳۶۵ میلیونه افغانۍ لګښت راغلی دی.
د طالبانو مرستیال ویاند حمدالله فطرت ویلي چې په پام کې لري د افغانستان په لرې پرتو سیمو کې نورې پراختیايي پروژې هم پلې کړي.
واخان سړک د بروغیل له سیمې د چین تر پولې غځېدلی او د افغانستان او چین ترمنځ لومړنۍ ځمکنۍ ترانزیټي لار ګڼل کېږي.
طالب چارواکي وايي چې دا لار له چین او د سیمې له هېوادونو سره د افغانستان د سوداګرۍ، ترانزیټ او اقتصادي اړیکو د پراختیا زمینه برابرولی شي.
