۸صبح، کابل: طالبانو ویلي چې په پنجشیر کې د ۳۵ زرو امریکايي ډالرو په ارزښت یو روغتیايي مرکز جوړ او ګټې اخیستنې ته وسپارل شو.
باختر خبري اژانس دوشنبه د وږي پر ۲مه راپور ورکړی چې دا روغتیايي مرکز د حصه اول ولسوالۍ په «جرویش» کلي کې جوړ شوی او شپږ خونې لري.
د راپور له مخې، د دغه مرکز په جوړېدو سره د سیمې اوسېدونکو ته د روغتیايي خدماتو لاسرسی برابر شوی دی.
دا په داسې حال کې ده چې په افغانستان کې روغتیايي نظام له جدي ننګونو سره مخ دی.
په تېرو پنځو کالو کې د روغتیا په برخه کې ستونزې زیاتې شوې او محدودیتونو او د مالي ملاتړ کمښت هم په هېواد کې د روغتیايي خدماتو پر وړاندې کولو منفي اغېز کړی دی.
