۸صبح، کابل: د طالبانو د عامې روغتیا وزارت ادعا کړې چې په افغانستان کې یې د میندو او ماشومانو د مړینې د کمولو او د روغتیايي شاخصونو د ښه کولو لپاره پنځه کلن پروګرام پیل کړی دی.
نوموړي وزارت سهشنبه د زمري پر ۱۳مه خبر ورکړی چې ټاکل شوې په هر ۱۰۰ زره ژوندیو زېږونونو کې د میندو د مړینې کچه له ۱۹۶ څخه ۱۵۰ پېښو ته راټیټه شي او له پنځو کالو د کم عمرو هرو زرو ماشومانو کې د مړینې کچه له ۵۵ څخه ۴۰ ته کمه شي.
د یاد وزارت په خبره، د دغه پروګرام په لړ کې به د بنسټيزو روغتیايي خدماتو پوښښ له ۶۷ سلنې ۹۰ سلنې ته پورته شي او په کور دننه د درملو تولید به هم ۹۰ سلنې ته لوړ شي.
دا په داسې حال کې ده چې د روغتیا نړیوال سازمان خبرداری ورکړی و چې افغانستان لا هم په روغتیايي برخه کې له جدي ننګونو سره مخ دی.
نوموړي سازمان ویلي چې خوارځواکي، د مخنیوي وړ ناروغیو خپرېدل، د مالي سرچینو کمښت او روغتیايي خدماتو ته محدود لاسرسی د دغې برخې لویې ننګونې دي؛ هغه چې د روغتیايي پروګرامونو د موخو پلي کېدل له ستونزو سره مخامخوي.
