۸صبح، کابل: د طالبانو د اطلاعاتو او کلتور وزارت د هنر او فرهنګ معین عبدالرحمن طیبي د اغاخان موسسې له رییس اجمل میوندي سره په غور کې د جام څلي د ساتنې په موخه د ګډې هوکړې پر لاسلیک خبرې کړې.
باختر خبري اژانس چهارشنبه د زمري پر ۲۱مه راپور ورکړی چې دواړو خواوو د جام څلي د خوندیتوب، بیارغونې او استحکام پر څرنګوالي بحث کړی دی.
اجمل میوندی ویلي چې د اغاخان د فرهنګي خدماتو موسسې د جام څلي د ساتنې او بیارغونې لپاره یونسکو ته رسمي لیک استولی دی.
نوموړي زیاته کړې چې هڅه کوي ژر د دغه تاریخي اثر د ترمیم او بیارغونې چارې د اطلاعاتو او کلتور وزارت په همغږۍ پیل کړي.
عبدالرحمن طیبي د اغاخان د فرهنګي خدماتو له موسسې غوښتي چې د افغانستان د نورو تاریخي اثارو د بیارغونې په برخه کې هم همکاري وکړي.
