۸صبح، کندهار: ځایي سرچینې وايي چې طالبانو په کندهار کې د تېر حکومت د مخدره توکو پر وړاندې د مبارزې رییس ګل محمد شکران او د هغه زوی نذیراحمد شکران نیولي دي.
سرچینو سه شنبه د تلې پر ۷مه، ۸صبح ورځپاڼې ته وویل چې ګلمحمد شکران د جمهوریت نظام له سقوط وروسته د کندهار ښار په یوه خصوصي روغتون کې کار کاوه.
د سرچینو په وینا، تر اوسه د ګل محمد شکران او د هغه د زوی د نیولو لامل څرګند نه دی.
په وروستیو اوونیو کې د طالبانو له خوا د تېر حکومت د ملکی او پوځي کارکوونکو د نیولو پېښې زیاتې شوې دي.
د ۲۰۲۱ کال په اګسټ کې د طالبانو له بیا واکمنېدو وروسته هم د تېر حکومت د کارکوونکو او امنیتي ځواکونو د نیولو او ګواښلو راپورونه خپاره شوي دي.
دې بهیر د خلکو او بشري حقونو د بنسټونو اندېښنې راپارولې دي.
