۸صبح، کابل: طالبانو ویلي چې په فراه کې د فراه – فراهرود سړک د قیر اچولو چارې د ۹۸۲ میلیونو افغانیو په لګښت پیل شوې دي.
باختر خبري اژانس یکشنبه د تلې پر ۱۲مه راپور ورکړی چې دا پروژه د طالبانو د ټولګټو چارو وزارت له خوا پيل شوې او ټاکل شوې چې په ۱۶ میاشتو کې بشپړه شي.
په فراه کې د طالبانو د ټولګټو چارو رییس محمدولي ادریس ویلي چې دا سړک څه باندې ۶۱ کیلومتره اوږدوالی لري.
په فراه کې د طالبانو مرستیال والي محمدګل خیبر ویلي چې دا سړک یو نړیوال مسیر دی او له لارې به یې افغان سوداګریز توکي ایران او نورو هېوادونو ته ولېږدول شي.
طالبانو له سوداګرو، خلکو او چلوونکو غوښتي چې پر دې لار له اندازې زیات توکي بار نه کړي.
