۸صبح، کندهار: طالبانو په کندهار کې د دولتي او ځينو موسسو د کارکوونکو لپاره د ځيرکو مبایلونو کارول منع کړي او خبرداری یې ورکړی چې سرغړونکي به مجازات شي.
هغه لیک چې چهارشنبه د چنګاښ پر ۳مه ۸صبح ورځپاڼې ته رسېدلی، ښيي چې طالبانو د روان کال د چنګاښ میاشتې له لومړۍ د کندهار په دولتي ادارو کې د ځيرکو مبایلونو پر کارونې بندیز لګولی دی.
د دغه لیک پر بنسټ، دا پرېکړه په کندهار کې د طالبانو د والي او د نظامي محکمې د حکم له مخې شوې ده.
د دغه امر له مخې، له ټاکل شوې نېټې وروسته که له هر کارکوونکي سره ځيرک مبایل ولیدل شو، د طالبانو نظامي محکمې ته به معرفي او مبایل به هم ضبط شي.
ویل کېږي چې د «طالبانو د څارنې او تعقیب ریاست» د دغه امر د پلي کولو مسوول دی.
دا په داسې حال کې ده چې له دې وړاندې په یو شمېر نورو ولایتونو کې هم ورته محدودیت لګېدلی دی.
په دې وروستیو کې طالبانو پر هېوادوالو په ځانګړې توګه پر ښځو او دولتي کارکوونکو پراخ محدودیتونه لګولي چې له کبله یې په کور دننه او نړیواله کچه غبرګونونه راپارولي دي.
