۸صبح، کابل: سرچینې وایي چې طالبانو په کابل ښار کې د لویې جرګې تالار ته غځېدلې څو لارې، د یوې لویې غونډې د جوړېدو له امله تړلې دي.
سرچینو چهارشنبه د لړم پر ۲۰مه ۸صبح ورځپاڼې ته ویلي چې طالبانو د لویې جرګې تالار شاوخوا سیمو کې سخت امنیتي تدابیر نیولي او دغه ځای ته غځېدلې لارې یې تړلې دي.
د سرچینو په خبره، طالبانو د لویې جرګې په تالار کې یوه لویه غونډه جوړه کړې، خو تر اوسه یې د موخو په اړه جزییات نه دي خپاره شوي.
ورته مهال ځینو سرچینو د کابل پر اسمان د څرخي الوتکو د ګزمې خبر هم ورکړی دی.
له بلې خوا، په کابل کې یو شمېر موټرچلوونکو د باغ بالا د لارې او د پوليتخنیک پوهنتون پر لور د غځېدلي سړک له تړل کېدو شکایت کړی او ویلي یې دي چې ساعتونه په دغو لارو کې د ترافیکي ګڼې ګوڼې له امله بند پاتې دي.
طالبانو تر اوسه د دې غونډې د جوړېدو او د لویې جرګې د تالار په شاوخوا کې د کلکو امنیتي تدابیرو په اړه څه نه دي ویلي.
