۸صبح، فاریاب: طالبانو په فاریاب پوهنتون کې محصلانو ته خبرداری ورکړی چې که ږیره یې کمه کړې وي، له منوګرافه به د دفاع اجازه ونه لري او همدارنګه د فراغت په مراسمو کې له ګډونه به هم محروم پاتې شي.
سرچینو چهارشنبه د چنګاښ پر ۳۱مه ۸صبح ورځپاڼې ته منلې چې دا پرېکړه د فاریاب پوهنتون د «دعوت او ارشاد کمېټې» له خوا محصلانو ته اورول شوې ده.
طالبانو د یوه مکتوب له لارې خبرداری ورکړی چې هغو محصلانو چې ږیره یې په ماشین کمه یا خریلې وي، له منوګرافه به د دفاع اجازه ونه لري.
د دغې پرېکړې له مخې، هغه محصلان چې سپارښتنې له پامه وغورځوي، د فراغت په مراسمو کې به د ګډون اجازه هم ونه لري.
سرچینې وايي چې دغې پرېکړې د فاریاب پوهنتون د ځينو محصلانو اندېښنې راپارولې دي.
دا په داسې حال کې ده چې واک ته د طالبانو له رسېدو وروسته د نجونو پر مخ د پوهنتون دروازې وتړل شوې او نارینه محصلان هم له ګڼو محدودیتونو سره مخ شوي دي.
له دې مخکې سرچینو خبر ورکړی و چې په خوست کې د شیخ زاید پوهنتون له لیلیې ځينې محصلان د ږیرې نه لرلو له کبله ایستل شوي دي.
