۸صبح، کابل: طالبانو د کابل په پغمان ولسوالۍ کې شاوخوا ۵۰ جریبه ځمکه د ځانګړې محکمې د پرېکړې له مخې «امارتي» اعلان کړې ده.
د طالبانو عدلیې وزارت چهارشنبه د تلې پر ۲۹مه په خپرې کړې خبرپاڼې کې لیکلي چې دا ځمکه د مرکزي زون د غصب شویو ځمکو قضیو ته د رسیدګۍ ځانګړې محکمې له خوا د اسنادو او مدارکو له ارزونې وروسته «امارتي» تثبیت شوې ده.
د خبرپاڼې له مخې، په دې ځمکه کې ۸ قطعې شاملې دي او د کابل د پغمان ولسوالۍ د ارغندۍ په سیمه کې دي.
نوموړي وزارت زیاته کړې چې مخکې هم دا ځمکه د ځمکو له غصب څخه د مخنیوي او د غصب شویو ځمکو د استرداد کمېسیون له ارزونې وروسته «امارتي» تثبیت شوې وه.
دا په داسې حال کې ده چې طالبانو څه موده مخکې هم په پغمان کې شاوخوا ۱۲۲ جریبه ځمکه «امارتي» تثبیت کړې وه.
