په مسکو کې د طالبانو پلاوی: که اشرف غني استعفا وکړي، سوله کوو

۸صبح، کابل: د محمد عباس ستانکزي په مشرۍ د طالبانو يو پلاوي چې روسيې ته يې سفر کړی، هلته يې په يوه خبري ناسته کې ويلي چې د افغانستان اوسنی حکومت د سولې پروړاندې «يوازينی خنډ» دی او که بين الافغاني مذاکرات يوې پايلې ته ورسېږي، نو «نوی اسلامي حکومت به رامنځته شي او د اشرف غني حکومت له منځه ځي».
مسکو ته د طالبانو د تللي پلاوي غړي، محمد عباس ستانکزي د روان کال د سلواغې په لسمه، د جمعې په ورځ وويل: «که نن اشرف غني له جګړې لاس واخلي او ووايي چې استعفا کوم او د سولې لپاره قرباني ورکوي، نو موږ له نوي حکومت سره خبرو ته چمتو يؤ… په همدې سبب مذاکرات هم کوو».
نوموړي وويل: د دوحې تړونليک په اساس يو «نوی اسلامي حکومت» به جوړ شي او د هغه په اړه تصميم افغانانو پورې اړه لري.
ستانکزي همداراز وويل، چې د افغانستان نوي اسلامي حکومت په جوړېدو سره به، د محمد اشرف غني په مشرۍ حکومت پای ته رسېږي. د نوموړي په وینا، اوسنی حکومت په دې سبب د سولې په پروسه کې خنډونه رامنځته کوي څو د خپلې واکمنۍ دوره اوږده کړي.
د طالبانو د مرکچي پلاوي غړي وويل چې نوی اسلامي حکومت د سولې مذاکراتو د اجنډا برخه جوړوي او د دوحې په تړونليک کې يې په هکله يادونه شوې ده او اوس هم د مذاکراتو د مېز پر سر پرې بحث کېږي.
ستانکزي وویل: «د امريکا په تړونليک کې داسې راغلي دي چې، د افغانستان نوی اسلامي حکومت. د افغانستان نوی اسلامي حکومت معنی دا ده چې د اشرف غني حکومت بايد پای ته ورسېږي او د ټولو افغانانو لپاره د منلو وړ يو حکومت رامنځته شي.»
د طالبانو د مرکچي پلاوي غړي د دې پوښتنې په ځواب کې چې ايا په دوحه کې د اشرف غني د حکومت د پای ته رسولو په اړه خبرې شوي دي، ويل چې طالبان هره ورځ د افغانستان دولت مرکچي پلاوي سره د نوي حکومت د جوړښت په اړه خبرې کوي.
محمد عباس ستانکزي د محمد اشرف غني په مشرۍ حکومت يې په هېواد کې د سولې پروړاندې يوازينی خنډ وګڼه او ويې ويل چې اشرف غني د دې په لټه کې دی چې د خپلې واکمنۍ دوره وغځوي.
د نوموړي په وینا د دولت پلاوي ته صلاحيت نه دی ورکړل شوی او د طالبانو پروړاندې عمليات ډېر شوي دي.
د ولسمشرۍ ماڼۍ مرستيال وياند دواخان مینه پال وايي چې اساسي قانون د ولسمشر د کار دوره مشخصه کړې ده او اوسنی ولسمشر د خپلې کاري دورې وروسته، واک هغه چا ته لېږدوي چې د خلکو د رايو په وسيله ټاکل شوی وي.
محمد اشرف غني په تېرو کې د سولې د ټيګښت په موخه د موقت حکومت د رامنځته کېدو او له واک نه د لرې کېدو ليدلوري په اړه کلک غبرګون ښودی دی.
نوموړي د پخواني ولسمشر ډاکتر نجيب الله چې د طالبانو لخوا په دار وځړول شو، يوه تېروتنه دا وبلله چې د استعفا لپاره يې خپل چمتووالی وښود.
ولسمشر غني څو څو ځلې ټینګار کړی دی چې اساسي مسؤليت يې د خلکو د رايو په اساس ټاکل شوي ځای ناستي ته د واک د لېږدول دي.
اساسي قانون د ولسمشر کاري دوره پنځه کاله ټاکلې ده.