۸صبح، کابل: د طالبانو ویاند مرستیال حمدالله فطرت له دغې ډلې سره د امریکا د میلیاردونو ډالرو مرستې ادعا رد کړې ده.
فطرت دا څرګندونې چهارشنبه د مرغومې پر ۱۹مه د طالبانو له خوا افغانستان ته د امریکا د مرستو د پیسو د کارولو په تړاو مطرح کړې دي.
د طالبانو ویاند مرستیال ویلي چې دا ډله د امریکا مرستې ته اړتیا نه لري.
د هغه په وینا، طالبانو هېڅکله له امريکا د مرستې غوښتنه نه ده کړې.
نوموړي ویلي چې امریکا طالبانو ته یوه روپۍ هم نه ده ورکړې.
د طالبانو ویاند مرستیال زیاته کړې چې امریکا هغو پیسو ته اشاره کوي چې له افغانستانه یې د خپلو همکارنو پر ایستلو لګولې دي.
هغه ټینګار کړی چې امریکا باید دا ډول لګښتونه کم کړي، ځکه دا پیسې د افغانستان د خلکو لپاره ګټه نه لري.
فطرت ادعا کړې چې امریکا په افغانستان کې د طالبانو د کمزوري کولو لپاره پیسې لګوي.
دا په داسې حال کې ده چې د امریکا ټاکل شوي ولسمشر ډونالډ ټرمپ له طالبانو سره د خپل هېواد پر مالي مرستو نیوکه کړې وه.
ټرمپ د دې مرستو د سملاسي بندېدو غوښتنه کړې ده.
څه موده مخکې د افغانستان د بیارغونې لپاره د امریکا د ځانګړي پلټونکي ادارې یا سیګار ویلي وچې واشنګټن په تېرو درېیو کلونو کې د طالبانو تر واک لاندې افغانستان سره د ۳.۳۳ میلیارده ډالره مرسته کړې ده.
