۸صبح، کابل: طالبانو خبر ورکړی چې د نورستان په مرکز پارون کې ویجاړونکو سېلابونو ۲۰ کسان مړه او څه باندې ۸۰ یې ټپيان کړي دي.
د طالبانو تر کنټرول لاندې باختر خبري اژانس دوشنبه د چنګاښ پر ۲۹مه راپور ورکړی چې د سېلابونو په پایله کې څه باندې ۱۰۰ کسان ورک دي او د لټون عملیات دوام لري.
پېښو ته د چمتوالې ادارې ویاند یوسف حماد ویلي چې د ورکو شویو کسانو د موندلو او د ژغورنې په موخې ډلې سیمې ته استول شوې دي.
نوموړي زیاته کړې چې د ژغورنې او مرستندویه عملیاتو له دوام سره، د مړو، ټپیانو او زیانمنو کسانو په شمېر کې د بدلون اټکل شته.
د راپورونو له مخې، د دغه ولایت په نورو ولسوالیو کې هم سېلابونه درانه مالي زیانونه اړولي دي.
