طالبان: د دوحې د موافقې پر ځای د نورو لارو لپاره هڅـې نه بریالۍ کېږي

طالبانو ډلې د دوحې د موافقې په کلیزه کې ددغې هوکړې د اجرا د څرنګوالي په هکله خپل دریځ اعلان کړ.
دغې ډلې د کب په لسمه نېټه په یوه اوه ماده ییزه اعلامیه کې د دوحې هوکړه لیک د افغانانو او امریکا لپاره تاریخي فرصت بللی دی.
طالبانو په دغه اعلامیه کې ویلي چې د دوحې هوکړه لیک په افغانستان کې د سولې او ثبات د راتلو لپاره عملي لاره رامنځته کړې او ددغې هوکړې پر ځای بله هر ډول هڅه ناکامه ده.
دغې ډلې همداراز ویلي چې له ځینو عملي نیمګړتیاوو سره سره، د دوحې موافقه په مثبت لوري روانه ده او دواړه خواوې به یې له پایلو ګټه پورته کړي.
طالبانو ډلې په دغه اعلامیه کې زیاته کړې چې امریکا د دوحې د هوکړې پر بنسټ ژمنه کړې چې په ۱۴ میاشتو کې به له خپلو متحدینو سره ټول پوځیان، غیر دیپلوماتیک کارکوونکي، شخصي امنیتي قراردادیان، استادان، سلاکاران او خدماتي کارکوونکي له افغانستانه باسي.دغې ډلې په هوکړه لیک کې د خپلې ژمنې په یادولو سره ويلي، طالبان هم ژمن دي چې چا ته اجازه ورنه کړي، د افغانستان له خاورې د امریکا او د هغې د متحدینو امنیت له ګواښ سره مخامخ کړي.
طالبانو ډلې ویلي چې د دوحې هوکړه لیک ټولو مادو ته ژمن دي او عملي کول یې د افغانستان د روان کړکېچ د اواري او سولې د ټینګښت لپاره اغېزمنه لار ده.
طالبانو له امریکا څخه هم غوښتي چې د موافقې د ټولو مادو په اجرا کولو سره، په افغانستان کې د سولې د ټینګښت لپاره خپلې ژمنې عملي کړي.
دغې ډلې همداراز ويلي چې د طالبانو د پاتې بندیانو د خلاصون او له تور لیسته ددې ډلې د مشرانو د نومونو د ایستلو ژمنې نه دي عملي شوې او باید د روانو بین الافغاني مذاکراتو د چټکیا لپاره عملي ګامونه پورته شي.
طالبانو ادعا کړې چې د هوکړې له مخې دوی خپل بریدونه کم کړي او پر لویو پوځي او استخباراتي مرکزونو بریدونه نه دي شوي. دغې ډلې همداراز وېلي چې د ولایتونو او ولسوالیو د سقوط لپاره یې پروګرام نه دي عملي کړی. په داسې حال کې چې ملي دفاع وزارت وایي: په روان کال کې یې د اتو ولایتونو او په لسګونه ولسوالیو د سقوط په موخه د طالبانو بریدونه په شا تمبولي دي.
طالبانو ډلې له قطر، د ملګروملتونو سازمان له امنیت شورا او ټولو هغو هېوادونو او نړیوالو څارونکو چې د موافقې د لاسلیک په مراسمو کې یې ګډون درلود غوښتي چې د دوحې د هوکړه لیک د بشپړ عملي کولو مسوولیت ادا کړي.
د جوبایدن اداره د دوحې د هوکړه لیک او هغو ژمنو د ارزونې په حال کې ده چې طالبانو یې د عملي کولو هوکړه کړې ده.
د افغانستان د ملي امنیت شورا له دې مخکې وېلي و چې د دوحې د هوکړې په لاسلیک کې له افغان دولت سره مشوره نه وه شوې او له همدې امله دا موافقه د سولې د ټینګښت او وینو توېیدو د بندیدو په برخه کې ناکامه ده. حکومتي چارواکو په ځلونو ویلي چې د دوحې په موافقه کې طالبانو ته زیات امتیازات ورکړل شوي دي.