۸صبح، کابل: د طالبانو تر کنټرول لاندې پېښو ته د رسېدو په چارو کې د دولت وزارت ویلي چې په هېواد د وروستیو سېلابونو راوتلو له کبله اته کسان مړه شوي او درې نور ټپيان شوي دي.
د نوموړي وزارت ویاند جانان سایق یکشنبه د غويي پر ۹مه ویلي چې ورښتونو او سېلابونو ۱۴۰ کورونه هم نړولي دي.
د سایق په خبره، په ننګرهار، تخار، میدانوردګ، هرات، کندهار، بادغیس، غور، سمنګان، پنجشېر، لغمان، کونړ، بغلان، کندوز، سرپل او پروان کې د وروستیو ورځو وروښتنو له کبله سېلابونه راوتلي دي.
له دې وړاندې د ملګرو ملتونو د ماشومانو وجهي صندوق (یونیسف) ویلي و چې د وروستیو سختو ورښتونو له کبله د افغانستان په اووه ولایتونو کې څه باندې یو زر او ۵۰۰ جریبه کرنیزه ځمکه، له ۵۴۰ څخه زیات استوګنیز کورونه او نورې طبیعي زیربناوې ویجاړې شوې دي.
په وروستیو ورځو کې د افغانستان په ډېری ولایتونو کې درنو پسرلنيو ورښتونو خلکو ته د سر زیان ترڅنګ درانه مالي زیانونه هم اړولي دي.