۸صبح، کابل: د طالبانو د چاپېریال ساتنې رئیس مولوي مطیعالحق خالص وايي چې د اقلیمي بدلون اغېزې ښځینه او نارینه نه پېژني.
خالص چې د اقليمي بدلون په نړيواله غونډه کې د دغې ډلې د يو پلاوي په مشرۍ د اذربايجان پلازمېنې باکو ته تللی، د دوشنبه د لړم پر ۲۱مه له اسوشيټېډپرېس خبري اژانس سره په مرکه کې ویلي چې د اقليمي بدلون پر وړاندې مبارزه ګډ کار ته اړتيا لري.
دې طالب چارواکې د اقلیمي بدلون د اغېزو پر وړاندې د ملګروملتونو د ارزونې پر بنسټ د نارینهوو په پرتله د ښځینهوو د زیانمنېدو په هکله د یوې پوښتنې په ځواب کې زیاته کړې ده: «اقلیمي بدلون هېڅ پوله نه لري، کولای شي پر ښځو، ماشومانو، نارینه، نباتاتو او حيواناتو خپلې اغېزې وکړي.»
نوموړي همداراز زیاته کړې چې طالبان له اقلیمي بدلون سره د مبارزې لپاره د نړیوالې ټولنې ملاتړ ته اړتیا لري.
د هغه په وينا، طالبانو په ملي کچه له اقليمي بدلون سره د مبارزې لپاره طرحې چمتو کړې دي.
دغهراز د طالبانو د چاپېریال ساتنې رئیس ویلي چې افغانستان د بادي او لمریزې انرژۍ د تولید ډېرې سرچینې لري.
د یادونې ده چې افغانستان د اقليمي بدلون له کبله ډېر اغېزمن شوى دى.
د اقلیمي کارپوهانو یوې نوې ارزونې افغانستان په نړۍ کې د اقلیمي بدلون له کبله شپږم زیانمن هېواد بللی دی.
د اقلیمي کارپوهانو په باور، تېرې څلور لسیزې په هېواد کې د د بارانونو د ورښت کچه ۲۵ سلنه شدید شوې ده.
له دې مخکې په افغانستان کې د ملګرو ملتونو د بشردوستانه مرستو همغږي کوونکي دفتر یا اوچا ویلي و چې افغانستان د اقلیمي بدلون له اغېزو د ۱۰ زیانمنوونکو هېوادونو په ډله کې دی.
