۸صبح، هرات: د هرات – خواف د اوسپنې پټلۍ د څلورمې برخې د لومړي پړاو د جوړولو چارې، د ۵۷ میلیونو ۱۱۱ زرو ډالرو په لګښت د ۴۳ کیلومتره په اوږدوالی بشپړې او دغه برخه ګټې اخیستنې ته سپارل شوې ده.
باختر خبري اژانس دوشنبه د تلې پر ۶مه راپور ورکړی چې د دې پروژې د پرانیستې په مراسمو کې د طالبانو د اوسپنې پټلۍ ادارې عمومي رییس عبدالکریم فاتح، د قزاقستان د سوداګرۍ وزارت مرستیال، په هرات کې د طالبانو والي او ځینو سوداګرو ګډون کړی و.
د طالبانو د اوسپنې پټلۍ ادارې عمومي رییس عبدالکریم فاتح ویلي چې دا پروژه د یوه قزاقستاني شرکت په همکارۍ جوړه شوې ده.
هغه زیاته کړې چې د هرات – خواف د اوسپنې پټلۍ د دې برخې په بشپړېدو سره به د توکو چټک او کملګښته لېږد ته لاره هواره شی.
د هرات – خواف رېل پټلۍ افغانستان د ایران له لارې د سیمې له رېل پټلۍ شبکې سره نښلوي او د افغانستان او د سیمې د هېوادونو ترمنځ د توکو د لېږد لپاره مهمه ده.
