۸صبح، کابل: د طالبانو تر کنټرول لاندې د احصایې او معلوماتو ادارې خبر ورکړی چې تر اوسه په افغانستان کې نږدې ۱۸ میلیونو ۳۰۰ زرو کسانو برېښنايي تذکرې ترلاسه کړې دي.
باختر خبري اژانس دوشنبه د تلې پر ۶مه راپور ورکړی چې د روان کال په لومړیو شپږو میاشتو کې ۸۲۷ زرو ۶۰ کسانو ته برېښنايي پېژندپاڼې وېشل شوې دي.
د شمېرو له مخې، په دې موده کې د تذکرو له ترلاسه کوونکو ۶۰۰ زره او ۵۴۶ یې نارینه او ۲۲۶ زره او ۵۱۴ ښځې وې.
کابل د ۲۳۲ زرو ۶۹۶ تذکرو په ثبتولو د افغانستان د ولایتونو په کچه د وېشل شویو تذکرو تر ټولو لوړه شمېره لري.
له کابل وروسته هرات، ننګرهار، کندهار او بلخ ولایتونه دي چې ډېرې پېژندپاڼې پکې وېشل شوې دي.
طالبانو ویلي چې اوسمهال په افغانستان کې د برېښنايي تذکرو اړوند خدمات د ۸۷ مرکزونو له لارې وړاندې کېږي او په ابوظبي کې هم د دغو خدماتو د وړاندې کولو لپاره د «اسان خدمت» یو مرکز فعال دی.
