۸صبح، کابل: طالبانو ویلي چې دوه ماشومان، یوه ښځه او یو نارینه چې د هلمند په ریګي دښتو کې یې لار ورکه کړې وه، ژغورل شوي دي.
باختر خبري اژانس یکشنبه د وږي پر لومړۍ راپور ورکړی چې له دغې کورنۍ سره د مل موټر چلوونکي د موندلو هڅې چې لا هم ورک دی، دوام لري.
د راپور له مخې، دا کسان د دیشو او ګرمیسر ولسوالیو ترمنځ په ریګي دښتو کې ورک شوي و.
دا په داسې حال کې ده چې څه موده مخکې ۱۴ افغانانو چې غوښتل یې په قاچاقي توګه ایران ته لاړ شي، مړي یې د نیمروز په دښتو کې موندل شوي و.
د کډوالو په چارو کې د ملګرو ملتونو عالي کمېشنرۍ هم خبر ورکړی چې د ناقانونه کډوالۍ پر لاره په نیمروز کې پنځو افغانانو ژوند بایللی او ۱۴ نور لادرکه دي.
