د امریکا ولسمشر ډونالډ ټرمپ له ایران سره جګړه د منځمهالو ټاکنو پر مهال د جمهوريغوښتونکي ګوند د ماتې له مهمو لاملونو څخه بللې، خو هممهاله یې د دې جګړې د پیلولو له پرېکړې دفاع کړې ده.
ټرمپ چهارشنبه د نومبر پر ۴مه ویلي چې هغه سم کار کړی او که بیا هم فرصت ولري، همداسې به وکړي.
هغه زیاته کړې چې له ایران سره جګړې د منځمهالو ټاکنو پر مهال د جمهوريغوښتونکي ګوند په درنې ماتې کې مهمه ونډه درلوده.
دا جګړه چې اوس نهمې میاشتې ته ننوتی، له پیله د امریکا د ګڼ شمېر وګړو له مخالفت سره مخ وه.
ډیموکراټانو هم د ټاکنیزو کمپاینونو پر مهال له ایران سره جګړه د تېلو او نورو توکو د بیو د لوړېدو لامل بللې ده.
د ایران د پارلمان رییس محمدباقر قالیباف هم ویلي و چې د امریکا خلکو له جګړې سره مخالفت کړی او د دغه هېواد حکومت دې د هغوی غوښتنې له پامه نه غورځوي.
