۸صبح، کابل: د طالبانو د کار او ټولنیزو چارو وزارت بهر ته د افغان کارګرانو د استولو په تړاو د دغې ډلې د بهرنیو چارو له وزارت سره د همغږۍ غونډې د جوړېدو خبر ورکړی دی.
نوموړي وزارت شنبه د مرغومې پر ۱۵مه په یو خپاره کړي بیان کې ویلي چې دا غونډه په بهر کې د افغان کارګرانو لپاره د اسانتياوو د رامنځته کولو په موخه جوړه شوې ده.
په بیان کې راغلي چې دا غونډه د طالبانو د کار او ټولنیزو چارو وزیر عبدالمنان عمري په مشرۍ هغو هېوادونو ته د افغان کارګرانو د استولو په موخه چې کارګران مني، جوړه شوې ده.
د بیان پر بنسټ، په دې غونډه کې د طالبانو د بهرنیو چارو وزیر امیرخان متقي او د کورنیو چارو، عامې روغتیا وزارتونو او د دې ډلې د احصایې او معلوماتو ملي ادارې استازو هم حضور درلود.
د طالبانو د کار او ټولنیزو چارو وزارت ویلي چې په بهر کې د افغان کارګرانو د ستونزو د حل او د ښه کار د اسانتیاوو او برابرولو په موخه دې یو پنځه اړخیزه طرحه جوړه شي.
نوموړي وزارت زیاته کړې چې دا غونډه د طالبانو غایب مشر ملا هبتالله په امر جوړه شوې ده.
دا په داسې حال کې ده چې اوسمهال په میلیونونو افغانان په هېواد کې دننه له بېکارۍ او بېوزلۍ کړېږي.
پر افغانستان د طالبانو له واکمنېدو وروسته د بېوزلۍ او بېکارۍ له کبله د ځانوژنې او کورنۍ تاوتریخوالي کچه هم لوړه شوې ده.
