۸صبح، کابل: د طالبانو مالیې وزارت خبر ورکړی چې د دغه وزارت وزیر محمدناصر اخوند ایران ته د رسمي سفر په لړ کې د دغه هېواد د بهرنیو چارو له وزیر سیدعباس عراقچي سره لیدلي دي.
یاد وزارت یکشنبه د لړم پر ۲۴مه ویلي چې په دې لیدنه کې د ګمرکونو پر ۲۴ ساعته فعالیت او د سرحدي دروازو د وړتیا پر لوړولو هوکړه شوې ده.
د نوموړي وزارت په خبره، په دې لیدنه کې د ابونصر فراهی ګمرک د سرحدي زېربناوو پر پراختیا او د بیارغونې د بهیر پر چټکتیا هم خبرې شوې دي.
د ګډې اقتصادي همکارۍ کمېسیون د راتلونکې غونډې جوړول او د دوغارون، ماهیرود او میلک بندرونو د ظرفیت لوړولو باندې هم بحث شوی دی.
عراقچي هم له طالبانو سره په اقتصادي او سیاسي برخو د ایران د همکارۍ ډاډ ورکړی دی.
