۸صبح، کابل: د طالبانو د صنعت او سوداګرۍ وزارت ویلي چې د افغانستان او ایران ترمنځ د کلنۍ سوداګرۍ کچه ۳.۶ میلیارده ډالرو ته رسېدلې ده.
دغه وزارت د پنجشنبه د زمري پر ۱۵مه، په یوه خبرپاڼه کې ویلي چې دا مهال ایران د افغانستان تر ټولو لوی سوداګریز شریک ګڼل کېږي.
د دې خبرپاڼې له مخې، افغانستان ایران ته ګران بيه ډبرې، وچه مېوه، کرنیز محصولات، غير الکولي څښاک توکي، د ډبرو سکاره او نباتي محصولات صادروي.
دغه راز، افغانستان له ایرانه سونتوکي، خوراکي مواد، صنعتي توکي، خام مواد، وسپنه، غالۍ او نور اړین توکي واردوي.
دا په داسې حال کې ده چې د افغانستان او پاکستان ترمنځ په سوداګرۍ کې د پرلهپسې خنډونو او ځنډونو له امله طالبانو هڅه کړې چې له ګاونډیو هېوادونو، په تېره بيا ایران سره خپلې سوداګریزې اړیکې پراخې او د هېواد د اړتیا وړ توکو د برابرولو لپاره بدیلې لارې رامنځته کړي.
