۸صبح، کندهار: په کندهار ولایت کې سرچینې وايي چې د طالبانو د اطلاعاتو او کلتور ریاست له خبریالانو غوښتي چې د ځانوژنې اړوند راپورونه خپاره نه کړي.
سرچینو دوشنبه د وږي پر ۲۳مه، ۸صبح ورځپاڼې ته وويل چې د طالبانو د اطلاعاتو او کلتور ریاست په کندهار کې له سیمهییزو او فعالو خبریالانو غوښتي چې د ځانوژنې د پېښو خبرونه خپاره نه کړي، ځکه د دوی په وینا، د دغو خبرونو خپرول د «نظام پر ضد» ګڼل کېدای شي.
د سرچینې په وینا، طالبانو همداراز د ځینو جنايي جرمونو په اړه د خبرونو خپرول هم منع کړي چې لامل یې اقتصادي ستونزې بلل کېږي.
دا په داسې حال کې ده چې په وروستیو میاشتو کې د افغانستان په ځینو ولایتونو کې د ځانوژنې د پېښو د زیاتېدو په اړه راپورونه خپاره شوي دي.
د دې ډول راپورونو پر خپرولو محدودیتونه کولای شي د دغو پېښو د کچې او لاملونو په اړه معلوماتو ته لاسرسی سخت کړي.
