۸صبح، هرات: طالبانو خبر ورکړی چې د هرات د لرغونو منارونو ترمنځ غځېدلی سړک چې څه موده مخکې د تګراتګ پرمخ پرانېستل شوی، بېرته وتړل شو.
د هرات د والي ویاند محمدیوسف سعیدي پنجشنبه د وري پر ۲۰مه په خپله اېکس پاڼه کې لیکلي چې دا سړک د دغه ولایت د والي په امر تړل شوی او له دې وروسته پرې د موټرو تګراتګ بند دی.
دا سړک چې د هرات د لرغونو منارونو ترمنځ غځېدلی، د تېر کال په دلوې میاشت کې د ترافیکي ګڼې ګوڼې له کبله د دغه ولایت د ښاروالۍ له خوا د تګراتګ پرمخ پرانېستل شوی و.
د هرات اوسېدونکو ټينګار کړی چې پر دغه سړک د موټرو تګراتګ ښايي د منارونو له منځه تللو ګواښ رامنځته کړي او د خوندیتوب لپاره یې باید پر دې لارې تګراتګ بند شي.
دا سړک شاوخوا ۱۵ کاله وړاندې د یونیسکو او د لرغونو اثارو د متخصصانو په غوښتنه تړل شوی و څو د هرات تاریخي منارونه خوندي پاتې شي.
