۸صبح، کابل: طالبانو په ننګرهار کې د تالک کان د درېیم بلاک د استخراج هوکړه له یوه کورني خصوصي شرکت سره لاسلیک کړې ده.
د طالبانو د کانونو او پټرولیم وزارت سهشنبه د وږي پر ۱۷مه په اېکس پاڼه کې لیکلي چی دا کان شاوخوا ۷ کیلومتره مربع ساحه پوښي.
د خبرپانې له مخې، دا هوکړه چې څه باندې څلور میلیونه او ۵۰۰ زره امریکايي ډالره ارزښت لري، د طالبانو د کانونو او پټرولیم وزیر هدایت الله بدري او د تاک عمر فاروق د پروسس خصوصی شرکت ترمنځ لاسلیک شوې ده.
طالبانو ویلی چې قراردادي شرکت به د هر ټن تالک د استخراج په بدل کې ۱۳۲۰ افغانۍ ورکوي.
دغې ډلې ویلي چې د کان په استخراج سره به سیمهيیزو خلکو ته کاري بوختیاوې او خدمات هم برابر شي.
دا په داسې حال کې ده چې د هېواد په بېلابېلو برخو کې د طالبانو له خوا له کورنیو او بهرنیو شرکتونو سره د کانونو د استخراج هوکړې له سختو نیوکو سره مخ دي او دا ډله یې د کانونو په لوټلو تورنه کړې ده.
