۸صبح، کابل: طالبانو شاوخوا پنځه ورځې وروسته په کابل کې د امریکا د بې پیلوټه الوتکې په برید کې د القاعدې شبکې د مشر ایمن الظواهري د وژل کېدو په اړه غبرګون ښوولی دی.
افغانستان کې د طالبانو سرپرست حکومت پنجشنبه د زمري پر ۱۳ د یوې ویناپاڼې په خپرولو کابل ته د القاعدې شبکې د مشر ایمن الظواهري د راتګ او دلته یې د اوسېدو په اړه بې خبري ښوولې ده.
هغوی ویلي، چې مشرتابه یې کشفي او استخباراتي ادارو ته لارښونه کړې؛ تر څو د پېښې د مختلفو اړخونو په هکله هراړخیزه او جدي څېړنه وکړي.
په ویناپاڼه کې یو ځل بیا ټينګار شوی، چې «د افغانستان له خاروې د امریکا په ګډون هېچا ته ګواښ نه دی متوجه شوی، د دوحې هوکړې عملي کول غواړي او له هوکړې سرغړونه باید پای ته ورسېږي.»
په ویناپاڼه کې راغلي، چې امریکا د افغانستان پر قلمرو تېری کړی او په خبره یې، دا له ټولو نړیوالو اصولو سرغړونه او ظلم دی.
په دې ویناپاڼه کې خبرداری ورکړل شوی، چې د دا ډول پېښو تکرار په صورت کې د هر ډول پایلو مسوولیت د امریکا پر غاړه دی.
د یادونې وړ ده، چې د روانې اوونۍ په پیل کې د امریکا بې پیلوټه الوتکې د برید په پایله کې د القاعدې ډلې مشر ایمن الظواهري په کابل کې ووژل شو.
