۸صبح، لوګر: د هېوادوالو پر وړاندې د طالبانو د محدودیتونو په دوام، دا ځل د امربالمعروف او نهې عنالمنکر مامورینو په لوګر کې صرافانو ته خبرداری ورکړی چې د ږیرې خرییلو او خولۍ نه لرلو په صورت کې به د هغوی فعالیتونه ودروي.
سرچینو دوشنبه د لړم پر ۱۴مه، ۸صبح ورځپاڼې ته وویل چې د طالبانو د امر بالمعروف او نهې عنالمنکر وزارت يو پلاوى د خلکو د ږيرې او خولۍ د څارنې په موخه لوګر ته تللى دی.
دغه پلاوي په خپل لومړني اقدام کې صرافان د ږیرې پرېښودلو او خولۍ پر سر کولو ته اړ کړي دي.
طالبانو د لوګر اوسېدونکو ته ویلي چې د امربالمعروف او نهې عنالمنکر مامورین د دغې ډلې د اوامرو د څرنګوالي نظارت او څارنه کوي.
د سرچينو د معلوماتو پر بنسټ، طالبانو د دغه ولايت کسبګرو په ځانګړې توګه صرافانو ته خبردارى ورکړى چې که د دغې ډلې له حکم څخه د سرغړونه په صورت کې به د هغوی دوکانونه وتړي.
همداراز د طالبانو د امربالمعروف او نهې عنالمنکر مامورینو له خلکو غوښتي چې د لمانځه پر وخت دوکانونو وتړي او جوماتونو ته لاړ شي او د «شریعت خلاف» له پولي راکړې ورکړې ډډه وکړي.
د یادونې ده چې پر افغانستان د طالبانو له واکمنېدو وروسته ولس د دغې ډلې له سختو بندیزونو سره لاس او ګرېوان دی.
د طالبانو د امربالمعروف او نهې عنالمنکر د نوي قانون له توشېح وروسته د هېوادوالو پر وړاندې د دغې ډلې محدودیتونه ډېر شوي دي.
دا په داسې حال کې ده چې تېر کال طالبانو په لوګر کې لسګونه دولتي کارکوونکي د ږيرې د اصلاح کولو او خولۍ نه پرسر کولو له کبله له دوو تر درېيو شپې پورې بنديان کړي وو.
