۸صبح، غزني: د غزني سیمهییزې سرچینې وايي چې د طالبانو د امر بالمعروف او نهې عنالمنکرو غړو په دغه ولایت کې د پوهنتون استادانو او زدهکړیالانو لپاره د ږېرې پرېښودل او خولۍ پر سر کول جبري کړي دي.
سرچینو شنبه د لړم پر ۱۹مه، ۸صبح ورځپاڼې ته وویل چې دا امر د غزني په انجینرۍ او تخنیکي پوهنتون کې د امر بالمعروف او نهې عنالمنکر غړو او د دغې ډلې د دعوت او ارشاد ریاست مسوولانو ترمنځ له ګډې غونډې وروسته شوی دی.
د سرچينو په وینا، طالبانو زدهکړیالانو ته سپارښتنه کړې چې خپلې ږيرې دې نه خریي او پوهنتون ته د ننوتلو پرمهال دې لونګۍ یا خولۍ پر سر ولري.
د سرچينو د معلوماتو پر بنسټ، طالبانو زدهکړیالانو ته خبردارى ورکړى چې له دغه امر سره د مخالفت په صورت کې به له پوهنتونه وشړل شي.
د یادونې ده چې طالبانو د هېواد د یو شمېر نورو دولتي پوهنتونونو زدهکړیالانو ته هم دا امر کړی و.
څو ورځې مخکې طالبانو د بدخشان پوهنتون استادان، کارکوونکي او زدهکړیالان د ږیرې پرېښودلو او خولۍ پر سر کولو ته اړ کړي وو.
