د غزني ولایت د قرهباغ ولسوالۍ د باغعطار او ګلکوه سیمو یو شمېر اوسېدونکي وايي چې د طالبانو ځواکونو د دوی شخصي او پلرني کرنیزې ځمکې نیولې دي. د سیمې د اوسېدونکو په وینا، د دغو ځمکو یوه برخه دوه کاله مخکې د پاکستاني طالبانو تحریک (ټيټيپي) د ښارګوټي جوړولو لپاره ځانګړې شوې او بله برخه یې په تېره یوه میاشت کې په اجاره ورکړل شوې ده.
د ګلکوه سیمې اوسېدونکي له ۸صبح ورځپاڼې سره په خبرو کې وايي چې د دغو ځمکو مساحت شاوخوا ۱۸۰۰ جریبه دی. د دوی په وینا، د طالبانو د کرنې او مالدارۍ ریاست دغه ځمکې دولتي اعلان کړې او د یوې خصوصي شرکت له لارې یې نورو کسانو ته په اجاره ورکړې دي. دوی ټینګار کوي چې دغه ځمکې له خپلو نیکونو په میراث ورپاتې دي او د ۱۳۲۷ لمریز کال د مالیې د ورکړې له اسنادو سره یوځای شرعي قبالې او نور اسناد هم لري؛ خو د طالبانو تر واک لاندې لسګونو اړوندو ادارو ته له مراجعې او عدالت غوښتنې سره سره، د دې ډلې هېڅ یوه چارواکي د دوی غوښتنو ته پاملرنه نه ده کړې.
د هغه مکتوب له مخې چې ۸صبح ورځپاڼې ترلاسه کړی، د طالبانو د کرنې او مالدارۍ ریاست د یوه وړاندیز له لارې د دې ډلې د کرنې له وزارته غوښتي چې لانجمنې ځمکې د کرکېلې لپاره یوې خصوصي شرکت ته په اجاره ورکړي. د طالبانو د کرنې وزارت هم له دغه وړاندیز سره هوکړه کړې ده؛ دا په داسې حال کې ده چې د سیمې اوسېدونکي وايي، د دغو ځمکو د ملکیت قانوني او شرعي اسناد لري.
د غزني ولایت د قرهباغ ولسوالۍ اوسېدونکی مهدي وايي، په تېرو څو میاشتو کې یې له یو شمېر ځایي مخورو سره یوځای د طالبانو تر کنټرول لاندې څو وزارتونو او ادارو ته مراجعه کړې؛ خو د دې ډلې هېڅ یوې مرجع د دوی شرعي اسناد او قبالې نه دي څېړلې.
د قرهباغ دغه اوسېدونکی وايي: «د طالبانو د کرنې وزارت، د دې ډلې عدلیې وزارت، د ځمکو اداره، د طالبانو د امر بالمعروف او نهی عن المنکر وزارت او څو نورو بنسټونو ته مو مراجعه وکړه؛ خو هېڅوک هم حاضر نه شو چې زموږ اسناد وګوري. موږ له کلونو راهیسې په دغو ځمکو کې کرکېله کړې، قبالې لرو او د هېواد په بېلابېلو حکومتونو کې مو د همدې ځمکو مالیه ورکړې ده؛ خو اوس په یوه شپه کې پرېکړه شوې چې دا ځمکې دولتي دي. دا په رښتیا ظلم دی.»
د ګلکوه سیمې یو بل اوسېدونکی له ۸صبح ورځپاڼې سره په خبرو کې ټینګار کوي چې درې کاله مخکې هم د دوی د ځمکو یوه لویه برخه د ټيټيپي د ښارګوټي جوړولو لپاره ځانګړې شوې وه او اوس یې پاتې ځمکې هم د دولتي ځمکو په نوم د طالبانو کسانو ته سپارل شوې دي. هغه دغه اقدام د هزارهګانو پر وړاندې ښکاره تبعیض بولي او وايي: «له بده مرغه، طالبان په ښکاره او څرګنده توګه له هزاره خلکو سره په دښمنۍ کې دي. دوه کاله مخکې یې زموږ ځمکې ټيټيپي او وزیرستانیانو ته وسپارلې او اوس یې پاتې برخه خپلو وسلهوالو کسانو ته ورکړې ده. هغوی زموږ اسناد او قبالې بیخي له پامه غورځولې دي.»
دا په داسې حال کې ده چې طالبان د دویم ځل واکمنېدو راهیسې پر هېواد د سختو محدودیتونو پر لګولو سربېره، پر شیعه ټولنې هم خپل فشارونه په بېساري ډول زیات کړي او د هېواد په بېلابېلو ولایتونو کې یې د دوی سلګونه جریبه ځمکې مصادره کړې دي. یوازې په تېره یوه میاشت کې، طالبانو د اهل تشیع اړوند د ګڼو علمي، ښوونیزو، روغتیايي، ورزشي او رسنیزو بنسټونو پر تړلو سربېره، د کابل په لوېدیځ کې د امید سبز ښارګوټي د ځمکو په دولتي اعلانولو سره، د دغه ښارګوټي اوسېدونکي د خپلو کورونو د پرېښودو بهیر هم پیل کړی دی.
