۸صبح، کابل: د طالبانو د ریاست الوزرا اقتصادي مرستیالۍ ویلي چې د ازبکستان لومړي وزیر د دغې ډلې له اقتصادي مرستیال سره په کتنه کې ژمنه کړې چې له خپلې خاورې په تېرېدو سره د منځنۍ اسیا هېوادونو ته د افغانستان د تازه میوو د صادراتو لپاره هر ډول اسانتیاوې رامنځته کوي.
یادې مرستیالۍ پنجشنبه د وږي پر ۸مه په یوې خپرې کړې خبرپاڼه کې د طالبانو د ریاست الوزرا اقتصادي مرستیال عبدالغني برادر او د ازبکستان لومړي وزیر عبدالله عارفاوف ترمنځ له کتنې خبر ورکړی دی.
نوموړې مرستیالۍ د ازبکستان د لومړي وزیر له قوله لیکلي چې افغانستان د دغه هېواد په بهرنۍ پالیسۍ کې مهم ځای لري.
د خبرپاڼې په حواله، عارفاوف ویلي چې ازبکستان له حیرتان څخه تر هرات پورې د اوسپنې پټلۍ شبکې د غځولو لپاره خپل تخنیکي ټیمونه معرفي کړي او چمتو دي چې په خبره یې، په راتلونکې سپټمبر میاشت کې د دغه پروژې د پيل او همدا راز د ګازو د استخراج په موخه افغانستان ته لاړ شي.
د طالبانو د ریاست الوزرا د اقتصادي مرستیال ملا عبدالغني برادر په مشرۍ پلاوی نن د «ترمز نړیوال سوداګریز مرکز» د پرانیستلو په مراسمو کې د ګډون لپاره ازبکستان ته تللی دی.
ویل شوي چې د دغه نړیوال سوداګریز مرکز لومړۍ برخه شاوخوا دوه کاله وړاندې د دواړو هیوادونو د سوداګرو ترمنځ د اقتصادي او سوداګریزو همکاریو د پراختیا په موخه ګټې اخیستنې ته سپارل شوې وه.
