د تخار ولایت د رستاق ولسوالۍ یو شمېر اوسېدونکي وایي چې طالبانو د درې ورځني پسرلني جشن د جوړېدو په درشل کې د ښځو د ګډون لپاره نوي محدودیتونه لګولي دي. د دوی په وینا، طالبانو په دې ولسوالۍ کې ښځو ته خبرداری ورکړی چې ان له لرې واټنونو څخه هم دا جشن ونه ګوري.
د رستاق ځینې اوسېدونکي وایي چې د طالبانو له واکمنېدو وروسته، ښځې په دې ولسوالۍ کې د مراسمو او جشنونو له لیدلو بېبرخې شوې دي. د دوی په وینا، د طالبانو د حکم له مخې ښځې ان له لرې غونډیو هم نه شي کولای د وزلوبې، غېږنیونې او نورو هغو ځایي لوبو ننداره وکړي چې په دې ولسوالۍ کې درې پرلهپسې ورځې ترسره کېږي.
د رستاق دغه اوسېدونکي زیاتوي چې طالبانو هغوی ته خبرداری ورکړی چې ښځې باید په بشپړه توګه د ځایي لوبو او نورو تفریحي فعالیتونو له لیدلو محرومې شي او که ښځې ولیدل شي، د دغړ مراسمو تنظیموونکي او اوسېدونکي به د دې ډلې له لوري په سخت ډول مجازات شي. دوی ټینګار کوي چې په ټول کال کې همدا درې ورځې یوازینی محدود فرصت دی چې خلک پکې تفریح کوي، خو اوس ښځې له همدې فرصته هم بېبرخې شوې دي.
د تخار یو سرچینه چې د امنیتي اندېښنو له امله یې هویت په راپور کې نه دی څرګند شوی، په دې تړاو وایي:« په رستاق کې سر له نننه درې ورځنی پسرلنی جشن پیل شوی دی، خو په دې په زړهپورې محلي تفریحي مراسمو کې ښځو ته د ګډون اجازه نشته. طالبانو اعلان کړی چې ښځې باید هېڅکله د دغه جشن په شاوخوا ونه لیدل شي.»
د تخار دغه اوسېدونکی زیاتوي: «په تېرو کلونو کې ښځې له لېرې ځایونو د نندارې لپاره راتلې. د جمهوریت په دوره کې به هغوی د نارینهوو تر څنګ ګډون کاوه؛ یوازې د ښځو لپاره جلا ځای په پام کې نیول شوی و.»
د سیمې اوسېدونکي وایي چې په تېرو کلونو کې ښځو لږ تر لږه له لېرې واټنونو دا جشن ننداره کاوه، او د جمهوریت په دوره کې به یې هم کولای شول په دې مراسمو کې د نارینهوو تر څنګ ګډون وکړي؛ که څه هم د هغوی لپاره جلا ځایونه ځانګړي شوي وو.
د سیمې یو اوسېدونکی وایي:« طالبانو ان تر ټولو کوچنۍ خوښي او تفریح هم له ښځو اخیستې ده او نه غواړي چې هغوی دا خوښۍ ان له لېرې هم وویني.» د دې سرچینې په وینا، طالبانو د لوډسپیکرونو له لارې خلکو ته اعلان کړی چې ښځو ته باید اجازه ورنه کړل شي چې دا لوبې او د نارینهوو ساتېرۍ وګوري.
د تخار د رستاق ولسوالۍ اوسېدونکي هر کال د نوروز او نوي کال په مناسبت په دې ولسوالۍ کې درې ورځې جشن نیسي. پخوا به ښځو هم د دغو مراسمو او لوبو په ننداره کې ګډون کاوه، خو طالبانو د دغو کلتوري جشنونو پر وړاندې د محدودیتونو په لګولو سره ښځې په بشپړه توګه د هغو له لیدلو محرومې کړې دي.
طالبانو نه یوازې ښځې تفریحځایونو ته له تګ او ورزش کولو منع کړې دي، بلکې د لسګونو فرمانونو په صادرولو سره یې ښځې او نجونې د زدهکړې، تحصیل او کار له حقه هم بېبرخې کړې دي. دې ډلې په خپل د «امر بالمعروف او نهی عن المنکر» قانون کې د ښځو غږ او څېره هم «عورت» بللې ده او له محرم پرته یې د هغوی له کوره وتل هم منع اعلان کړي دي.
