۸صبح، بدخشان: سرچینې وايي چې د طالبانو لسګونه رنجر موټر له کوفاب څخه شکي ولسوالۍ ته رسېدلي او د دې ولسوالۍ په مرکز کې ځای پر ځای شوي دي.
سرچینو شنبه د چنګاښ پر ۱۳مه ۸صبح ورځپاڼې ته ویلي چې سیمې ته د دغو ځواکونو له ننوتلو وروسته، په شکي او نسي کې د طالبانو په ځينو اداري او امنیتي برخو کې بدلون رامنځته شوی دی.
ویل کېږي چې په ځينو سیمو لکه کوفاب، شکي او نسي کې د طالبانو استخبارات ځينې مدیران ګوښه او نوي کسان یې پر ځای ګومارل شوي دي.
سرچینې ادعا کوي چې د «موسی کاکه» په نوم یو کس چې مخکې د کندوز په زندان کې و، طالبانو له ځان سره بیولی څو له دغه کس سره تړلي کسان راټول او بې وسلې کړي.
په دوام کې راغلي چې په شکي کې هم د «عبدالغني» په نوم یو کس ته وسلې ورکړل شوي او د جمعه خان فاتح اړوند کسانو سره د مقابلې لپاره بیول شوی څو د هغه د کسانو د نیولو او بلنې په برخه کې همکاري وکړي.
دا په داسې حال کې ده چې په بدخشان کې ترینګلتاوې زیاتې شوې او د دغه ولایت په ځينو سیمو کې امنیت وضعیت اندېښمنوونکی ګڼل شوی دی.
