نن یې، ملالۍ میوند، د تورو خاورو کړه!
تر دې دمخه یې الیاس داعي، په غاښو وچیچه!! لا ترمخه یې یما سیاوش، په شنه ځوانۍ کې ختم کړ!!!
ترهګریزې پالیسۍ، اصلا د افغان انسان په ذهن و روان، داړې خښې کړي او د انسانیت مجموعي دښمنه ده!
دا څه کیسه ده!؟ دا چا جوړه کړې!؟ څوک یې لوبغاړي دي!؟ اخر څه غواړي؟ د خلکو په ژوند و فکر و چلند د چا څه کار!؟
د معلوماتو له مخې، په تېرو ۱۹ کلنو کې (۱۳۳) خبریالان، د ترهګرۍ د اژدها خوراک شوي دي.
ترور، د انسان د مغزو، زړه اختراع ده! خو ترهګر- هغه که دې هر دین و باور، فکر و ایدیالوجۍ، تاج پر سر تړلی وي؛ له دې کړنې څه غواړي؟
ښایي ووایي، ناروا له منځه وړم! ظالم ختموم!! تیارې ختموم!!! او داسې نور. نو راځئ دا ووایو، چې دا کړنې څه اغېز و څه پایله رامنځته کوي؟
ترور، هغه که د هرچا لخوا وي او هغه یې که په هر هدف سرته رسوي؛ لویه لاسته راوړنه یې، د ډله ییز امنیت وژل دي! ترور- حتا له عامو وګړو، ښاریانو، کسبګرو، زدکړیالانو…راوني امنیت اخلي او د هر یوه پر سر د «داموکلس توره» را ځړوي!!
دولت د اساسي قانون، د بیان د آزادۍ قانون او بیا اطلاعاتو ته د لاسرسي قانون موظف کړی، چې ولسي باور او ذهنیت د رواني جنګ له تیارو راوباسي او هغوي د رڼو، دقیقو او مستندو حقایقو په لمر کې کښینوي.
ځکه نو دولت ته په کار ده- په هره بیعه چې کېږي- ددغو پېښو ریښې پیدا او په پوره جرآت یې له ولس سره شریکې کړي!
دې لپاره دولت ته په کار ده، چې خپل ټول استخباراتي او پولیسي ځواک د ترور د روان فصل پر ضد منسجم کړي. دغه جګړه وړوکې برېښي؛ خو آغیز یې د لویو لویو میدانونو له وړلو اوچت دی. که دولت دا روښانه کړای شوه، چې ددغو پېښو سر چېرې تللی، نو بې له شکه، چې ټولنیز باور به را ژوندی شي او ولس به دا ومني، چې دغه نیمګړې ماته ګوډه ولسواکي، تر هر سیستم او حاکمیته، بختوره ده.
ترهګري، که په هر ذهني یا اقتصادي- ټولنیز هدف تر سره کېږي؛ ټولنه وژني او دا د تاریخ لویه نامردي ده.
بله خبره: هغه ځواک او هغه خدای بنده، چې د یوې خبریالې یا خبریال د آواز له اورېدلو په زړه مري، نو پوه شه، چې دنیا یې ورانه ده او اخرت کې هم بیکسه دی!