۸صبح، کابل: د کرېکټ نړیوالې شورا په کلنۍ غونډه کې د دغې شورا د ټولو ۱۰۸ غړو هېوادونو ترڅنګ د افغانستان کرېکټ بورډ هم د خپل ګډون خبر ورکړی دی.
کرېکټ بورډ دوشنبه د زمري پر لومړۍ نېټه په خپله اېکسپاڼه کې لیکلي چې دا غونډه د سریلانکا په کولمبو ښار کې جوړه شوې وه.
د افغانستان کرېکټ بورډ په یوې خپره کړې اعلامیه کې ویلي چې د دې بورډ عمومي مشر میرویس اشرف د افغان کرېکټ لاسته راوړنو، فعالیتونو او راتلونکو پلانونو په اړه د نړیوالې شورا له مشرتابه او د بشپړ غړیتوب لرونکو هېوادونو سره خبرې کړې دي.
په اعلامیه کې راغلي: «سربېره پر دې په دغه غونډه کې د افغانستان کرېکټ بورډ مشرتابه د سویلي افریقا، نیوزلېنډ او وېسټ انډیز هېوادونو له مشرانو سره له چمپین ټرافي وړاندې د ملي لوبډلې د لوبلړیو پر تنظیم او ترسره کېدو خبرېاترې وشوې.»
دغهراز، له بنګلهدېش او زېمبابوې سره د الف لوبډلې لوبلړیو سربېره له پاکستان او اماراتو سره د ۱۹ کلنو لوبغاړو د درې اړخیزې لوبلړۍ پر تنظیم هم خبرې شوي دي.
افغان کرېکټ بورډ ویلي چې د دې لوبلړیو کره نېټې به په راتلونکو ورځو کې توګه اعلان شي.
د اعلامیې په وینا، په یاده غونډه کې د ایسيسي مشرتابه او غړو هېوادونو په ۲۰ اوره نړیوال جام کې د افغان لوبډلې لاسته راوړنې ستایلي او زیاتوي چې د افغانستان کرېکټ ورځ تر بلې د غښتلتیا په حال کې دی.
که څه هم د کرېکټ نړیوالې شورا د یادې غونډې له پېل وړاندې ویلي و چې د افغان کرېکټ بورډ له مشرتابه سره به د ښځینه لوبډلې د نشتوالي پر ننګونو هم خبرې وکړي؛ خو یاد بورډ یې په دې تړاو څه نه دي ویلي.
