د امریکایي سرتېرو له وتلو سره هممهاله طالبانو په بېړه د دولت تر ولکې سیمې لاندې کړې. طالبانو ۲۰۰ ولسوالۍ ونیولې. له ډېرو ولسوالیو دولت شاتګ وکړ. د ولسوالیو تر پرله پسې سقوط وروسته، طالبانو ویلي، چې په څو اوونیو کې ټول افغانستان نیولی شي.اوسمهال دغه ډله په پنځو لویو او ستراتیژیکو ښارونو کې له امنیتي ځواکونو او ولسي پاڅونوالو سره په جګړه کې ده. امنیتي ځواکونه له طالب اورپکو سره په تالقان، هرات، کندهار، هلمند او شبرغان ښارونو کې په مخامخ جګړه بوخت دي. کندهار کې سرچینو ویلي، طالبانو په تېره یوه میاشت کې ۹۰۰ کندهاریان وژلي دي. د وروستیو اونیو جګړو له کبله، په تخار او نورو ولایتونو کې ګڼې ودانۍ ویجاړ شوې دي. جګړه هره ورځ، مړي او ټپیان پرېږدي او د جبران وړ نه ده. د ملي دفاع وزارت په خبره، هرو څلورویشت ساعتونو کې له ۳۰۰ تر ۴۰۰ طالب وسله وال تلفات لري.
د امریکایي ځواکونو له وتلو وروسته طالبانو انګېرله، چې دولت به وپرځېږي او پر افغانستان به بیا واکمن شي. اوسمهال په ټولو لویو ښارونو کې ولس د امنیتي ځواکونو تر څنګ د دې ډلې پر وړاندې جنګېږي. له هراته د اسماعیل خان په مشرۍ د «الله اکبر» نعرو غورځنګ، طالبان حیران کړل. طالبانو پر هرات د لوی برید تابیا کړې وه؛ خو د هرات ښځو او سړیو د شوروي پر وړاندې د ۵۷ کال قیام په څېر، وسلې واخیستې او د طالبانو پر وړاندې يېد «الله اکبر» نعرې پورته کړې.
د الله اکبر نعرې د افغانانو له لوري د انګلیس او شوروي پر وړاندې ورکړل شوي دي او اوس دا دی د طالبانو پر وړاندې ورکړل شوې. د الله اکبر نارې د نفرت وروستی حد ښيي او همدارنګه د طالبانو د سختګیره نظام د بیا راتګ له ډاره ورکړل شوې دي. خلکو د الله اکبر نعرو په ورکولو سره د طالبانو پر وړاندې عمومي مخالفت ښکاره کړ. همدارنګه دې ډلې د الله اکبر نعرې په ویلو سره پر ښارونو، امنیتي ځواکونو او بهرنیو ځواکونو بریدونه کول. اوس خلکو، طالبان پوه کړل، چې دا کلمه د وژنې، وینې تویولو او د افغانانو د ټکونې کلمه نه ده. د طالبانو پر وړاندې د تکبیر نعرې د یووالي لامل شوې. دغه ډله ییز خوځښت امنیتي ځواکونو ته هم روحیه ورکړه او د طالبانو پر وړاندې یې د هغوی جنګ ته انساني رسالت او قدسیت وباښه.
د هېواد په ښارونو کې د طالبانو پر وړاندې ولسي خوځښت له هغوی سره د مخالفت په مانا ده. د امریکايي ځواکونو له راتګ وروسته دا لومړی ځل دی، چې خلک، سیاسي مشران او دولت په متحده توګه د الله اکبر نعرې په ورکولو سره د طالبانو پر وړاندې درېږي او کرکه ترې کوي.
طالبان کولی شي ولسوالۍ سقوط کړي او ښايي وکوای شي، ځینې ښارونه هم ونیسي؛ خو د ولسوالیو او ښارونو سقوط د دې ډلې د بریا په مانا نه ده. طالبان ښايي د وحشت او وېرې خپرولو له لارې، ځينې سیمي ونیسي؛ خو د هغوي روایت، یو مات شوی روایت دی. د طالبانو روایت د افغانستان لپاره مناسب نه دی او خلک یې نه مني. د دې ډلې روایت، د منلو نه دی. همدا اوس، د طالبانو تر واک لاندې سیمې له هر ډول خدماتو بې برخې دي.
ولس پر سیمو د طالبانو د مدیریت ناتواني او تر دې مهمه د دې ډلې له خوا انسان ته بې پروايي، په سترګو ویني. دې وضعیت ته په کتو، ولس د طالبانو پر وړاندې د شعار په ورکولو پاڅېدل او یوموټي شول، تر څو له خپلو سیمو دفاع وکړي. خلکو په وروستیو ورځو کې دغې ډلې ته وښووله، چې که امریکایان تللي، دوی شته او له خپل وطنه دفاع کوي.






