دغه کتاب چې په ۳۶۹ مخونو کې په ښکلي صحافت سره چاپ شوی، ژباړن يې ښاغلی عطا محمد مياخېل دی.
د کتاب منځپانګه د ګډ ژوند پر هنر او څرنګوالي راڅرخي او د ځوانانو لپاره ګټوره نسخه بلل کېږي.
د دغه کتاب ژباړن، ښاغلي مياخېل له ۸صبح پښتو مجلې سر په خبرو کې وويل: «د ګډ ژوند هنر کتاب زما د دوو کلونو هڅو او هاند پایله ده، د دې ارزښتمن کتاب د چمتو کولو لپاره مې د ګډ ژوند په برخه کې له بېلابېلو معتبرو سرچینو او وېبپاڼو د نړۍ د بېلابېلو مشهورو پوهانو مقالې خوږې پښتو ژبې ته را ژباړلي دي.»
نوموړی دغه کتاب د ګډ ژوند د هنر او څرنګوالي لپاره ځوانانو ته غوره ډالۍ بولي او په وينا يې د ګډ ژوند جوړه «نارينه او ښځينه» د دغه کتاب له منځپانګې په ګټې اخیستو کولی شي په خپل ورځيني ژوند کې مثبت بدلونونه راولی.
د دغه کتاب يو څو کرښې: «واده د ژوند د پایښت قانون دی او د ژوند د شریک ټاکنه د هر فرد په ژوند کې یوه پېچلې او مهمه مسئله ده. په مناسب ګډ ژوند کې جوړې، هوساینې، آرامتیا، ودې او اړین ویاړ ته لاسرسی پیدا کوي، خپل نوښت ښکاره کوي او دغه راز خپل هویت بشپړوي.
که غواړئ ښه او سالم ګډ ژوند ولرئ او د ژوند شریک مو دا حس کړي، چې هغه له خپل ځان سره برابر ګڼئ او احساساتو ته یې ارزښت ورکوئ، کله چې غواړئ د هر څه او آن د ورځنیو مسایلو په اړه تصمیم ونیسئ، د خپل ژوند د شریک نظریاتو ته په کافي اندازه ارزښت ورکړئ، که داسې چلند وکړئ، چې ګواکې باورونه یې مهم نه دي یا تل وروستۍ خبره تاسو کوئ، نو په واقعیت کې به مو ګډ ژوند له ګڼو ستونزو سره مخامخ شي.
هرومرو د خپل ژوند د شریک نظریاتو ته د خپلو لیدلورو په اندازه ارزښت ورکړئ او جدي یې ونیسئ. د خپل ژوند د شریک خبرو ته ښه غوږ ونیسئ او دا حس هغه ته ورکړئ، چې درته مهم دی».