۸صبح، خوست: په خوست کې ځايي سرچینې وايي چې په دغه ولایت کې پر «سرې خولۍ» له بندیز وروسته، طالبانو څو کسان سپک کړي او وهلي ډبولي یې دي.
سرچینو ویلي چې طالبانو سهشنبه د وږي پر ۱۳مه د خوست په بېلابېلو سیمو کې ځينې ځوانان د «سرې خولۍ» د کارولو لامله وهلي ډبولي او سپکاوی یې ورته کړی دی.
په خوست کې د طالبانو استخباراتو د روانې اوونۍ پر یکشنبه د «سرې خولۍ» پر کارولو بندیز ولګاوه.
دا خولۍ د پښتون ژغورنې غورځنګ نښه بلل کېږي.
دغه راز، په خوست کې دوکاندارانو ته هم ویل شوي چې «سرې خولۍ» ونه پلوري.
