د ملکي هوايي چلند ادارې د هوايي ترافیک کنټرول مسوولیت د ورسپارلو غوښتنه وکړه

د هېواد د ملکي هوايي چلند اداره نوموړې ادارې ته د ناټو له خوا د حامد کرزي د نړیوال هوايي ډګر په تېره بیا د هوايي ترافیک کنټرول د مسوولیت سپارلو ته خپل چمتووالی اعلان کړی دی.
دغې ادارې ناټو ځواکونو ته په یوه لیک کې ویلي چې د کابل د نړیوال هوايي ډګر د هوايي ترافیک کنټرول د ټولو چارو ترلاسه کولو ته چمتو دي او غواړي چې د روان میلادي کال د مې میاشتې تر لومړۍ نېټې دا مسوولیت وروسپارل شي.
په دغه لیک کې چې د وري په دېرشمه نېټه د ملکي هوايي چلند ادارې له خوا خپور شوی، په تېرو شلو کلونو کې د ناټو له خوا د هوايي ترافیک د خوندي کنټرول له امله مننه شوې ده.
د ملکي هوايي چلند ادارې د مالوماتو پر بنسټ، د حامد کرزي له نړیوال هوايي ډګره د ټول هېواد اویا سلنه هوايي خدمات وړاندې کېږي او د افغنستان د هوايي دروازې په توګه له سیاسي، اقتصادي او امنیتي پلوه لوړ ارزښت لري.
د ملکي هوايي چلند ادارې ویلي چې له دې مخکې هم له ناټو ځواکونو څخه په کندهار کې د احمدشاه بابا د هوايي ډګر د مسوولیت د لېږد تجربه هم لري. دغې ادارې د کندهار د هوايي چلند مسوولیت سپارل په بیړه بللي دي.
د ملکي هوايي چلند ادارې ویلي چې د ورته ستونزې د مخنیوي لپاره په دې برخه کې د مسوول بنسټ په توګه له وړاندې اقدام کوي ترڅو خپل مسوولیتونه پرغاړه واخلي.