۸صبح، هرات: د هرات سیمهییزې سرچينې وايي چې په دغه ولايت کې د یوه روغتيايي مرکز ٣٥ کارکوونکو د خپلو درېیو مياشتو معاشونو د نه ورکړې له کبله اعتصاب کړى دى.
سرچینو سهشنبه د لړم پر لومړۍ نېټه ۸صبح ورځپاڼې ته ویلي چې د روغتیا پراختیا موسسې (OHPM) له درېیو میاشتو راهیسې د کشک رباطسنګي ولسوالۍ د «تورغونډۍ» روغتیايي مرکز د کارکوونکو معاشونه نه دي ورکړي.
د سرچينو په وینا، کارکوونکو له کاري اعتصاب وروسته د دغه روغتيايي مرکز دروازه د مراجعينو پر مخ وتړله.
له دې مخکې سرچینو ویلي و چې طالبانو د (OHPM) موسسې بانکي حساب تړلی دی.
د معلوماتو پر بنسټ، د هرات د ١١٣ روغتيايي مرکزونو د کارکوونکو د درېيو مياشتو معاشونه نه دي ورکړل شوي.
د یادونې ده چې له دې مخکې د «رواشان» روغتيايي مرکز کارکوونکو کاري اعتصاب پېل کړى و.
