په انسانانو کې د خوب کولو توپیر

خوب په انسانانو کې توپیر لري چې اکثره وګړي په شپه او ورځ کې له لسو ساعتونو په کم خوب بسنه نه کوي، خو داسې خلک هم شته چې یوازې څلور ساعته بیده کېږي او په همدومره لږ خوب هم هڅاند او د پام وړ انرژۍ څخه برخمن وي. په دې وروستیو کې د بریتانیا څېړونکو هم دا نظر تایید کړی چې د خوب وخت په انسانانو کې توپیر لري.
د دغه هېواد پخوانۍ لومړۍ وزیره مېرمن مارګرېت تاچر هم له هغو وګړو وه چې په شپه او ورځ کې به یې له څلورو ساعتونو زیات خوب نه کاوه چې دې کار د نوموړې پر روغتیا کومه ناوړه اغېزه هم نه وه کړې. څېړونکو د همدې موخې د ثابتولو لپاره یو شمېر وګړي د ۴۷ ساعتونو لپاره په یوه آزمویښت ځاي کې ویښ وساتل، پر نوموړو وګړو آزموینو او غبرګونونو وښودله، هغه کسان چې د خوب کولو د لیوالتیا حس پکې پیاوړی دی تر نورو زیات ګنګس او ناتوانه وو، دغو څېړنو ښودلې، هغه وګړي چې لږ خوب کوي د شپې له څلورو د سهار تر اتو بجو پورې تر ډېره خپله ځیرتیا او فکري تمرکز له لاسه ورکوي. له همدې امله، په دې وخت کې یعنې د شپې له څلورو د سهار تر اتو بجو باید د خطرناکو شیانو په کارولو په تېره بیا موټر چلولو کې ډېر پام وشي. ځکه شمېرو ښودلې چې د نړۍ په اکثرو لویو ښارونو کې ډیرې ترافیکي پېښې په همدې وخت کې کېږي. په خوب کې د نفس بندېدل چې په عامه اصطلاح خپسکه ورته وایي هم له هغو ستونزو څخه دي چې یو شمېر خلک وسره مخامخ دي که دا ستونزه ډېره پرمخ تللې نه وي له ساده لارو لیرې کېدای شي لکه د وزن په کمولو او په یوه اړخ په بیده کیدو سره.
څېړنو ښودلې چې په نړۍ کې دوه سلنه ښځې او څلور سلنه نارینه د خوب پرمهال د تنفس له بندېدو یا خپسکې سره مخامخ دي او هغه چې د شپې له خوا په دندو بوخت وي باید د ورځې دوه درې ساعته بیده شي چې دا کار به له دوی سره د شپې د دندې پرمهال د هغوی له ځیرتیا سره مرسته وکړي. همداراز د شپې د بې خوبۍ د مخنیوي لپاره له خوبه مخکې د آرامۍ احساس په ځان کې پیدا کول او د چایو او ګاز لرونکو څښاکو له څښلو ډډه کول ډېر اغېزمن دي. په خوب کې خرهار کول هم په ځینو وګړو کې ارثي او په یو شمېر کې بیا د پوزې او وینو د غوړوالي له امله وي خو په دې صورت کې د وزن کمول او له خوب راوړونکو ګولیو ډډه کول اړین دي. باید ووایو چې د اسلام په سپېڅلي دین کې انسانانو ته سپارښتنه شوې چې په هر کار کې له افراط او تفریطه ډډه وکړي؛ دې اصل ته پام سره خوب کول هم که له حده زیات شي ناوړه زیانونه په ځان پسې لري او که لږ خوب وشي بیا هم د انسان د روحي کمزورۍ او فکري تمرکز د ګډوډېدو لامل کېږي چې علمي څېړنو هم دا نظریه تایید کړې ده.