۸صبح، کابل: د طالبانو تر کنټرول لاندې د برېښنا شرکت ویلي چې د برېښنايي میټرونو د جوړونې لپاره یې له یو چینایي شرکت سره تړون لاسلیک کړی دی.
د برېښنا د خبرپاڼې له مخې، د ٢.٧ ميليونه ډالرو په ارزښت دا تړون دوشنبه د غبرګولي پر ۱۴مه د دغه شرکت د عمومي اجرائيوي رئیس ملا محمدحنيف حمزه او د چين د میټر جوړونې «شينزين کلو» شرکت د استازي ترمنځ لاسليک شوی دی.
د دغه تړون له مخې، چینايي شرکت به د افغانستان لپاره شاوخوا ۱۵۰ زره یو فاز او درې فازه «معیاري» میټرونه جوړ او ولېږدوي.
تر دې دمخه خلکو د برېښنا میټرونه له ازاد بازار څخه اخیستل چې د برېښنا شرکت په وینا نرخونه یې ډېر لوړ وو.
برېښنا شرکت زیاته کړې: «د یاد شوي شرکت میټرونه د برېښنا شرکت له معیارونو سره سم جوړېږي او د شبکې د ښهوالي او پراختیا په برخو کې به ترې کار واخیستل شي.»
دا تړون په داسې حال کې لاسلیک کېږي چې د هېواد یو شمېر ولایتونه په ځانګړې توګه کابل د برېښنا له پرچاوۍ سره مخ دی او دا پلازمېنه هره ورځ څو ساعته برېښنا نه لري.
