۸صبح، کابل: په افغانستان کې د اروپايي ټولنې استازولۍ اعلان کړی چې په افغانستان کې یې د ۱۳.۵ میلیونه یورويي پروګرام د پلي کولو لپاره اغاخان بنسټ ته ۱۰ میلیونه یورو ځانګړې کړې دي.
نوموړې استازولۍ چهارشنبه د وږي پر ۱۱مه په خپرې کړې خبرپاڼه کې لیکلي چې د دغه پروګرام پاتې ۳.۵ میلیونه یورو به اغاخان بنسټ برابرې کړي.
د خبرپاڼې له مخې، دا پروګرام به د بېځایه شویو د مقاومتپیاوړتیا او بیا مېشتېدو بهیر پیاوړی او همداراز به په لسو ولایتونو کې اقتصادي وده، ښه کړي.
د اروپايي ټولنې په خبره، دا پروګرام به د درېیو کالو په موده کې په مستقیم ډول د ځوانانو، ښځو، زیانمنو کوربه ټولنو، راستنېدونکو او بې ځایه شویو په ګډون په مستقیم ډول ۸۳ زره او ۱۹۷ کسان او په غیرمستقیم ډول ۵۸۲ زره او ۳۷۹ کسان تر پوښښ لاندې راولي.
د اروپايي ټولنې استازولۍ زیاته کړې چې په دغه پروګرام کې به د اقلیمي بدلونونو پر وړاندې مقاومت او د کرنې پر بنسټ معیشت، اقتصادي وده، کارموندنه او همداراز د ټولنې د مقاومت پیاوړتیا او د بېځایه شویو کسانو دوامداره بیا ادغام برخې شاملې وي.
دا په داسې حال کې ده چې ملګرو ملتونو په دې وروستیو کې د راستنېدونکو او له طبیعي پېښو څخه د اغېزمنو لپاره د مرستو په برخه کې د بودیجې د سخت کمښت خبر ورکړی دی.
