د اوکراین ولسمشر ولادیمیر زیلینسکي وروسته تر دې چې دوه دولتي امنیتي ساتونکي یې د وژل کېدو پر پلان تورن شول، د خپلو امنیتي ساتونکو مشر یې له دندې ګوښه کړ.
د ګارډین راپور پر بنسټ، زیلینسکي پنجشنبه د مې پر ۹مه د سرهي رود د ګوښه کېدو امر وکړ، خو تر اوسه یې د هغه ځای ناستی نه دی په ډاګه کړی.
د اوکراین امنیتي شبکې دوه ورځې دمخه اعلان کړی و چې د دغه هېواد د دولتي ساتونکو دوه غړي یې نیولي چې د ولسمشر زیلینسکي او نورو لوړپوړو چارواکو د وژلو پلان یې درلود.
د دې شبکې د معلوماتو له مخې، نیول شوي کسانو له کریملین څخه امرونه ترلاسه کول او مسکو ته یې یو لړ محرم معلومات استول.
دغو دوو کسانو غوښتل چې د ولسمشر ساتونکي ته نږدې څوک ومومي، زیلینسکي یرغمل کړي او بیا یې ووژني.
ورته مهال د اوکراین پارلمان په یو بل ګام کې د هغو سرتېرو د نیولو او مجازاتو لپاره رایه ورکړه چې له لومړۍ کرښې تښتي، ځکه چې دغه هېواد د روسیې پر وړاندې جګړه کې د بشري ځواک له شدید کمښت سره مخ دی.
د اوکراین ولسمشر ولادیمیر زیلینسکي تر اوسه دغه لایحه نه ده لاسلیک کړې.
د دې لایحې له مخې، تښتېدلي سرتېري لږترلږه درې ورځې جریمه او بندیانېږي.
تیره ورځ سلواکیا اعلان وکړ چې لږترلږه ۳۳۸ اوکرایني سرتیري چې د جګړې له جبهې څخه تښتېدلي او په ناقانونه توګه د دغه هېواد له پولو تېر شوي، نیولي او بیا خوشې کړي دي.
د روسيې او اوکراين ترمنځ د جګړې له پيله شاوخوا ۸۰۰ ورځې تېرېږي او د دغه هېواد يو شمېر سيمې د روسي ځواکونو له خوا نيول شوې دي.
ورته مهال د اوکراین پوځ د تجهیزاتو او سرتېرو له کمښت سره مخ دی چې د جګړې په ډګر کې یې وضعیت د مسکو په ګټه بدلون کړی دی.
