ننګرهار او لغمان ولایتونو کې د وروستیو ورښتونو او سېلابونو له امله زیانمنې شوې کورنۍ شکایت کوي چې طالبانو ورسره هېڅ راز بېړنۍ او اساسي مرستې نه دي کړي. دوی وايي چې سېلابونو ورته ګڼ درانه مالي او ځاني زیانونه اړولي او تر شنه اسمان لاندې ژوند کوي؛ خو طالبانو تر اوسه له دوی سره پر کړو ژمنو عمل نه دی کړی. زیانمنې کورنۍ له اړوندو مرستندویه ادارو غوښتنه کوي څو له دوی سره دې د بېړنیو مرستو ترڅنګ د ستونزو د دایمي حل لپاره بنسټیزې مرستې وکړي.
۶۰ کلن میرزا محمد چې د ننګرهار د کوز کونړ ولسوالۍ د غازياباد سیمې اوسېدونکی دی او شاوخوا دوه اوونۍ وړاندې سختو ورښتونو او وېجاړونکو سېلابونو یې د کورنۍ د دوو غړیو د ټپي کولو ترڅنګ د هغه استوګنیز کور وېجاړ کړ له ستونزو سره لاس په ګرېوان دی.
دی وايي، په کور کې د خوراکي توکو په ګډون یې د کور ټول شته وسایل تخریب شوي چې له امله یې له ستونزو سره مخ دی او په خبره یې د نږدې دوو اوونیو په تېرېدو لا هم د طالبانو له لوري ورسره هېڅ ډول مرسته نه ده شوې چې د امکاناتو د نشتوالي له امله تر شنه اشمان لاندې ورځې شپې سبا کوي.
نوموړی له ۸صبح ورځپاڼې سره په خبرو کې وايي: «سېلابونو کې مې کور ړنګ شو، درې کوټې مې وې هغه ولوېدې، دېوالونه ونړېدل، دوه بچیان مې په کې زخمیان شول، طالبان څو ځل راغلل چې مرستې درسره کېږي، خو دا دی دویمه اوونۍ ده تر اوسه راسره هېڅ مرسته راسره نه ده شوې، سرپناه نه لرو، غټ او واړه تر شنه اسمان لاندې ویده کېږو، د ورځې هم د سیوري ځای نه لرو، ډېرو مشکلاتو سره مخامخ یو، باید مونږ سره عاجل کومکونه وشي.»
سیلاب ځپي دغه راز وايي، چې سیلابونو یې د پاکو اوبو ټولې څاه ګانې تخریب کړي، چې د پاکو اوبو د نشتوالي له امله پر ناروغیو اخته شوي. دوی له طالبانو او نړیوالو مرستندویه ادارو غوښتنه کوي چې زیانمنو شویو کورنیو ته دې د پاکو اوبو او روغتیا په برخه کې لازمې مرستې وکړي.
د کوز کونړ ولسوالۍ د غازياباد سیمې اوسېدونکی رحیم الله له ۸صبح ورځپاڼې سره په خبرو کې وویل: «سېلابونو یوازې زمونږ کورونه نه دي تخریب کړي؛ زمونږ څاهګانې یې هم خرابې کړي، پاکې اوبه نه لرو، د ویالې اوبه استفاده کوو، د ناپاکو اوبو د استعمال له وجې مو غټان او واړه په اسهال او نورو ناروغیو اخته شوي او باید مونږ ته د پاکو اوبو زمینه برابره شي؛ ځکه په دې کلي کې شااوخوا درې سوه کورنۍ ژوند کوي.»
په همدې حال کې د لغمان په مرکز مهترلام ښار کې هم وروستي سیلاب ځپلي شکایت کوي چې د سېلابونو له امله یې د سر او مال زیان لیدلی، خو په خبره یې د دوو اوونیو په تېرېدو لا هم طالبانو مرستې نه دي ور رسولي. دوی وايي، سیلابونو له سختو ستونزو سره مخ کړي او له نړیوالو مرستندویه ادارو غواړي چې د لومړنیو مرستو سربېره دې دوی سره د سرپناه په برابرولو کې مرستې وکړي.
د مهترلام ښار د بابا صیب سیمې اوسېدونکی شېر نواب له ۸صبح ورځپاڼې سره په خبرو کې زیاتوي: «په سیلابونو کې زما یو زوی ټپي شو، کور مې نړېدلی، خوراکي او غیر خوراکي شیان یې راته خراب کړي، ډېر درانه زیانونه یې راته اړولي، تر اوسه راسره هېڅ کومک نه دی شوی؛ زما غوښتنه دا ده، چې موسسات او طالبان باید مونږ سره هم د خوراکي موادو کومک وکړي، هم د کور په جوړولو کې راسره کومک وکړي؛ ځکه مونږ د هېڅ شي وس نه لرو، نه کار روزګار شته او نه مو د کور د ودانولو توان شته.»
۸صبح ورځپاڼې هڅه وکړه چې په ننګرهار او لغمان ولایتونو کې د وروستیو سېلاب ځپلو کورنیو د ستونزو او شکایتونو په تړاو په دې ولایتونو کې د طالبانو د اړوندو مسوولینو نظر هم ولري؛ خو له پر لپسط هڅو سره سره بیا هم ونه توانېدو چې د هغوی نظر ترلاسه کړو.
دا په داسې حال کې ده چې له ننګرهار او لغمان وروسته د کونړ په نرنګ ولسوالۍ کې هم د سختو ورښتونو او سېلابونو له امله یو کس مړ شپږ نور ټپیان شوي او شاوخوا ۹۰ استوګنیز کورونه تخریب او په ۴۰۰ جریبه کرنیزه ځمکه ولاړ کښتونه له منځه تللي دي.
