۸صبح، کابل: د پاکستان بهرنیو چارو وزارت ویلي چې د دغه وزارت وزیر اسحاق دار له خپل ترکمنستاني سیال سره د افغانستان او ټاپي پروژې په اړه خبرې اترې کړې دي.
د پاکستان بهرنیو چارو وزارت سهشنبه د زمري پر ۲مه په یوې خپرې کړې خبرپاڼې کې لیکلي چې اسحاق دار د ترکمنستان له بهرنیو چارو وزیر رشید مرادوف سره غږېدلی دی.
دواړو خواوو د ټاپي پروژې په ګډون د اقتصادي او انرژۍ په برخو کې د همکارۍ پر ودې ټينګار کړی دی.
په خبرپاڼه کې راغلي: «داوړو لوریو ژمنه کړې چې د سیاسي، اقتصادي او دفاعي برخو په ګډون د دوه اړخیزو همکاریو د لاپراخولو او ژورولو لپاره ګډې هڅې ګړندۍ کړي.»
په ۲۰۱۸ کال کې د ټاپي پروژې عملي کار له هراته پېل شو؛ خو څه موده وروسته یې چارې د امنیتي ګواښونو لامله وځنډېدې.
د مخکېني حکومت له پرځېدو وروسته طالبانو په وار وار د دغې پروژې د چارو پر پېل ټينګار کړی او ویلي دي چې امنیت یې ټينګوي.
تر اوسه طالبانو او ترکمنستان ویلي نه دي چې د ټاپي پروژې عملي چارې به څه وخت پېل شي.
