۸صبح، کاپیسا: د ازادۍ جبهې ویلي چې ځواکونو یې د کاپیسا ولایت په تګاب ولسوالۍ کې د طالبانو پر یوه قرارګاه برید کړی دی.
دې جبهې پنجشنبه د وږي پر ۱۹مه، پر اېکس ټولنیزې شبکې په خپره کړې خبرپاڼه کې لیکلي چې دغه برید تېره شپه شاوخوا ۸ بجې شوی دی.
د خبرپاڼې له مخې، په دغه برید کې درې طالب جنګيالي وژل شوي او دوه نور ټپیان شوي دي.
ازادۍ جبهې ویلي چې په دغو عملیاتو کې د دوی ځواکونو ته هېڅ زیان نه دی اوښتی.
دا په داسې حال کې ده چې تر دې وړاندې د ازادۍ جبهې په کونړ ولایت کې هم پر طالبانو د برید خبر ورکړی و.
په دې وروستیو میاشتو کې د هېواد په بېلابېلو سیمو کې د طالبانو پر وړاندې د دې ډلې د مخالفو جبهو بریدونه زیات شوي دي.
